2007年4月6日星期五
今日与我同居七年的女「性」（最初目的是「性」）朋友，在大家由星期三开始没有对话后，及我故意在早上九点多离开屋企，她下午两点左右，踏上去 New Zealand 嘅 Christchurch 的一步，目的是在当地搵「工」、搵「快钱」。
我七年前认识她时，她的身家在二百万元以上，在她离开香港的一刻，我估计她欠下咭数约六万，其它欠债大约四万。原因没有特别，当然是「赌」，但她输的大部份不是在赌场、麻雀、澳门或跑马，而是在与股票有关的「投资」上。
2006下半年全世界的股票都上升，当大部份人都赢到笑见牙唔见眼时，她就越输越多，皆因她由恒指一万八千点开始沽期货，五十蚊一点、二千点就输十万、五张期货就输五十万。重有国企期货，由六千五百点升上万一点。唉…………
。。。。。。。。。。
再一次决心崩溃 － 在写上一段文章时，还下定决心在她的飞机起飞前，唔会打电话俾佢，但系，「手」赢了「心」，我始终系一个感情丰富嘅人。
。。。。。。。。。。
「感情」一记
我读书成绩一向很差（冇心机，唔系蠢），中五会考前已经决定唔再升学。会考完结后就懒闲在家，当时家住政府廉租屋邨，一层楼有十数户，其中一户住有一家五口，父母外，其它三个都系女，大女二十岁左右已经嫁咗，二女十五岁，读中二，就系呢个女仔，身心都好早熟，同我「搞」（我俩个都系「青头」，大家付出俾对方，都几浪漫，但由于双方都无经验，在成功「搞」前，过程都几搞笑，有机会会讲吓），我都记唔起乜嘢原因，后来竟然同居起来，在旺角租了一间房，由于自己都知道年纪实在太细，咁就用兄妹名份，房入便张床就唔系「大床」，而系特登买张钢「碌架床」。
同居大约十日左右，一晚她打电话返屋企，佢阿妈话病咗，叫佢同我返去睇吓，点知返到佢屋企，佢家姊，姊夫，好似重有其它亲戚，嚟一招『迫婚』，在纠缠一轮后，我念仲系先脱身，再作打算，于是就同佢讲，我『会』番我屋企同我老豆、老母讲，听日再见面，佢哋咁都信我，放咗我走。这一走，我就同呢个早熟嘅少女永别。在此，我真心向我贡献给「我的第一次」的她说句对唔住，因为我，她中二后就停学，大好前程就咁样被改变。
注：此节的事情发生在七十年代初，当时我的会考成绩好似只有四科Ｅ级以上，但不包括英文。
。。。。。。。。。。
「感情」二记
三年后，有一个同公司工作的异性，不同部门，但时常有接触，她年纪大我一岁，是一个多性格嘅女仔。佢话佢巳经有一个好好嘅男明友，但喺个男仔又唔可以俾时间佢（所有女仔的口吻），咁有一次四个人两啤去澳门，我同佢一啤，两人单独喺酒店房（皇都酒店）过咗一晚，无越轨，但有亲热，就咁我又有另一段感情，仲好影响我的一生。
澳门一游后，最终都有搞埋一齐，但系佢仲有同条仔联络去街。在一个「晴朗的下午」（粤语片桥段），佢同我讲要去见条仔，同他讲分手，完事后会打电话俾我，我高兴之余，同佢讲 bye bye，一心等佢电话。
电话等到，但巳经系第二日嘅事。佢话俾我知，个日下昼同佢条仔见面，条仔话俾佢知，计划一齐去加拿大升学，佢成个人啉晒，当晚一齐瞓觉搞嘢，所以要同我分手。
真喺报应我飞咗读中二嗰个女仔单嘢。
。。。。。。。。。。
去加拿大，你去，我都要去，你哋家明白点解呢段感情影响我的一生。
以我的会考成绩，同时 TOEFL 唔够 500 分，点可以去加拿大升学，但当时揸住香港嘅 British Passport ，去加拿大唔使签证。我有个好死党嘅唐大佬（亲戚）当时系加拿大，我就同屋企人讲，巳经有学校收我，同阿妈攞咗好似一万蚊，买咗张经美国旧金山去加拿大嘅来回机票，香港－旧金山嗰程坐 Air Siam，喺旧金山过境时 passport 就俾航空公司收起（因为无美国签证）。
见到唐大佬后，揸住中学（政府中学）发出嘅完成中五课程嘅 certificate，佢就带我去当地省政府办嘅 College of Applied Arts and Technology 申请读 diploma course，间学校竟然收咗我，学费每年加币二百，无错，喺 two hundred Canadian dollars，因为当时加拿大喺无外来学生收费嘅政策。家每年学费承惠加币一万，三十年加价五十倍。
读完一年 college 后，以几好嘅成绩（根本课程好浅，唔使点读书），转咗去当地嘅大学读一年级，正式成为大学生（以前念都未念过），学费每年加币七百或者七百五十，总之四年加国读书，攞倒个 business admin 学位，学费总共唔超过加币三千。
。。。。。。。。。。
工厂返工，月薪二千
喺加拿大返嚟后，揾到一份会计嘅工作，系喺一间有工人上千嘅美国厂做，早八晚六，一至五，劳工假期。唉，大学毕业又点。
。。。。。。。。。。
5月12日 母亲节前夕
同屋企人吃饭时，一向好少讲我嘅大嫂，话我瘦咗好多。我讲，喺因为晚晚都瞓得唔好。呢嗰又系事实，自从她去咗新西兰后，无时无刻都谂住佢，加上无嘢做，每日嘅二十四小时都唔知点打发，日日朝早六点左右起身后，无所事事，到夜晚十二点，机能上感觉好攰，但瞓三、四个钟后，醒咗又好少瞓得番。
今日早上同佢讲电话，从纲上知道新西兰按摩嘅行情。首先，新西兰妓女，包括按摩院，通通都喺合法嘅。既然合法，按摩院就一定有「开大」嘅服务，因为要同妓女竞争。所以我好自然咁谂，佢又点会唔卖身，因为人人都做，你唔做又点有生意。但系新西兰按摩嘅定价，真系平过香港，三十分钟都有得做，八十蚊新西兰纸，大约港银四百五十，同老板平分，自己得唔够二百三十蚊，咁就要「卖」，我只能够讲 － 「贱」。
佢话，我都唔想。去买六合彩时，有边个会话我都唔想我唔中，但系，每一期六合彩，又有几多人中奖，机会率有几多。个讨论系，你在孤注一掷前，有冇谂过你唔想发生嘅嘢，即系输掉身家后，有乜嘢打算。我就话佢有谂过，攞护照、同以前喺香港一齐做按摩嘅朋友（之后去咗加拿大搵食）联络，即系计划如果唔想嘅嘢真系发生，就出国搵食。咁即系有谂过，唔系「我都唔想」。
佢又话，你唔谂唔系得啰。我话，我唔系一嚿石头，我系有思想（分折）、有感情，如果我可以接受一个因为赌输钱而卖身嘅女人做我嘅老婆，咁我自巳都好「贱」。
之后件事点样发展，我自己家都唔想去谂。
───── ─────
今晚我嘅「生意」拍档出发去巴西，我打电话比佢，希望一切顺顺利利，做成单生意。系电话道佢同我讲英文，我估计佢系有其它人同佢一齐，所以佢讲英文，向呢啲人「卖弄」。无论如何，佢同我都系坐埋一条船，我哋家都好唔掂，呢单生意只许成功，唔能够失败。天啊，成全我哋，多谢。
。。。。。。。。。。
5月12日
等到颈都长，终于收到拍档由巴西发出嘅电邮，又一次俾我估中，最紧要嘅几件事情都未完成，我希望啲嘢己经落实，只是欠一啲手续，大陆嗰客继续支持，最终做得成单生意。
───── ─────
讲番我个女朋友，佢一直以来都冇同我讲过佢点谂，即系话，如果佢赌钱前有同我讲过，佢要博一铺，如果一铺清嘅话，佢就会出呢做，咁我都喺事情未发生前，有机会表达我嘅意见。（我一定唔会赞同或者支持佢去博一铺，因为我唔系「人渣」，叫人去卖肉。唔好话呢个喺我嘅女朋友，任何女人，我都唔会咁做。）
家喺纽西兰每日发生喺佢身上嘅嘢，我一谂起就心如刀割，俗啲讲，比死更难受，系我永远无法可以接受嘅，要我去接受，即系叫我心灵上死咗，然后番生，乜都唔记得。事实当然唔系咁，首先，错不在我；其次，我身边仲有其它人 － 仔、女、老母、兄、弟、妹、朋友等，我冇可能为咗一个「博一铺」嘅人，去忘记其它人。
「赌」 － 真喺咁令人着迷？佢上赌船可以由晚黑九点一路赌到第二朝六点半赌场关门，然后又继绩接上昼船班，然后又继绩接夜晚船班，三日两夜，非常平常。
我冇钱，（或者（希望）巴西嘅生意成功嘅话，都有机会揾番多少。）余下嘅一生，我都唔想（真系唔想，唔似我女朋友，口话唔想，嗰脑就己经想得一清二楚。）再发生任何新的男女感情，或者我会同佢喺埋一齐，但我会同佢讲得好清好楚，对佢系基督城做嘅嘢，我非但唔会同情佢，我一世都唔会原谅佢。如果佢因为咁离开我，我只有祝福佢，我唔会可惜。
张学友 心如刀割
..... 触摸着你的心竟是透明的
你的悠然自得我却束手无策 .....
..... 其实我不想对你恋恋不舍
但什么让我辗转反侧 .....
..... 我是真的为你哭了 .....
..... 我心如刀割 .....
。。。。。。。。。。
佢礼拜日打过电话番嚟后，三日都冇电话，我心中最坏嘅谂法系，既然已经身在基督城，唔「做」嘅话，就白行一趟。讲老实话，虽然我极之唔想咁念，但系事实同现实都系，揾唔到钱嘅话，就非常唔现实，除非立即返香港，唔系嘅话，都系要向现实低头。
张曼玉同黎明拍过一套戏，叫「甜蜜蜜」，戏中段张曼玉同黎明分手，原因系张曼玉由大陆嚟香港系有个目的，后嚟去咗做按摩，认识咗曾志伟，之后曾志伟带埋张曼玉去美国，但系曾志伟系美国好快就死咗，而黎明同张曼玉就喺美国重逢。
或者佢有一个目的或者目标，我俾唔到佢，所以佢就要靠自己。但无论如何，我心中系有佢嘅存在，至于佢心里面有冇我，我真系唔知。有嘅语，又点会粒声唔出，亳无相量，就一走了之。冇嘅话，呢七年共同一齐生活，佢真系欺骗咗我，而我就蒙查查，以为自己有个伴侣。我哋会唔会重逢，天晓得！
。。。。。。。。。。
发生咁嘅事，都系一个「钱」字作怪，现实世界中，有边个唔系为钱出卖自己。
我自己就曾经为咗钱，被香港政府告过两次。第一次喺系我十八、九岁㗻时，偷咗老细个表同银行支票，个表就当咗，支票攞钱后，被老细发觉，报警拉人，被判缓刑。
我都唔知点讲，明知自巳有案底，都话要去加拿大，但又比我念倒方法，真系去咗加拿大四年。到呢一刻为止，对自巳嘅经历，两个字 － 无咎。
。。。。。。。。。。
喺加拿大四年生活，可以讲系多姿多釆，因为唐大佬嘅关系，系揾到学校后，就去咗一间唐餐馆做厨房 part time 。以前系香港从来未煑过嘢，系加拿大，又系为咗钱，就做一啲以前从未做过嘅嘢。
餐馆里，唐大佬嘅朋友系经理，仲有一个同我一样做厨房 part time嘅，呢个人之后发生系佢身上嘅嘢真系好传奇。
餐馆经理已经同一个都系香港去嘅女同学一齐，仲有一个仔，但系佢就同餐馆里一个 waitress 搞搞震，之后重生咗仔女。而我就同呢个waitress嘅家姊搞搞震几个月，之后佢就去揾其它中国同学 wet ，我同佢嘅关系，完全系肉体上需要。
。。。。。。。。。。
今天早上习以为常上了新西兰中文网溜览一刻后，忽然心里很难受，我下了以下的决定：
不再溜览新西兰中文网
要跟她分手
振作做人
过去的个几月，我实在太折磨自巳，每日瞓唔倒三、四个小时。现在巴西的生意看似很确实，我以经同我嘅拍檔讲，六月有第二或者第三单货出船，我想去巴西见识，我真的希望我可以将精神集中起来，不再去想她（应该冇可能，但系自巳都要订下目标）。
既然己经决定分手，我都唔想讲我有冇做错咗啲乜嘢，而我又觉得佢有乜嘢我觉得佢做得唔啱。难过就非常难过，三年前我发嗰一个电话短讯比佢，时间系旧历年尾，七个字 － 我很难过，你走吧。（过年过节要自己一个人忍受孤独寂寞）
我有同佢讲嗰，输钱要唔好影响到我，家我认为佢己经输咗个「家」，佢点谂，有冇后悔，都与我无关。
我唯一可惜嘅系佢个女，我一定唔会令个女仔难堪，若果佢有需要或者想继续留低喺我屋企住，我会无条件答应，毕竟嗰女仔系无辜嘅，我会永远都唔会讲比个女仔知，发生咗乜嘢事。
---------- ---------- ----------
---------- ---------- ----------
虽然早上所谓做咗决定，但心里都系唔能够平伏。食完饭后（其实呢个几月，冇一餐饭唔系因为肚饿先至将个肚填满，跟本就冇食饭嘅感觉），忽然恼海有一个天大荒谬嘅谂头，就系我要去基督城，看出个究竟。
己经有计划，首要条件系巴西单生意一定要百分百落实，然后系我加拿大返香港嘅朋友，系香港日子上嘅细节，如果佢哋去完台湾后，返香港会住上二、三日，又或者去完越南后，会系香港住上二、三日，咁我就会搭星期三晚嘅机，星期四到基督城，三日两晚后，星期六返香港。返香港时身边有冇一个人，我家自巳都唔想去谂；感觉上我星期三出发嘅机会都几大。
---------- ---------- ----------
《我在深圳当二奶》的网页
..... 这个社会中的万物也许都可以去主宰，但是人的心是没有任何力量可以去主宰的 .....
..... 在乎那个家，问问你们自己的良心，担心，选择，觉醒，害臊，人格，自尊，尊严，羞耻，丢人现眼，尊重，后悔，反省，报应，无耻，堕落，鄙视，被人唾弃，自讨苦吃，放纵，耻辱，肮脏，“一失足，成千古恨！” .....
..... 知道这个字：「丑」怎么读吗?知道这个字：「羞」怎么念吗?希望你拿自己当人看 .....
..... 你有没有想到你对他的伤害更大 .....
..... 爱情早已化成亲情。亲情之间存在的就是理解、关心、责任 .....
..... 到时候你再想让谁来同情你呢 .....
..... 就算原谅了你会觉得心安吗？ .....
..... 现实就是这样，是残酷，冷酷，无情。唯有亲情是最可贵的。也是最真实，最值得我们去珍惜。但不论，做什么事都别伤了亲人滴心。.....
..... 不管怎么说你所做的职业是不被社会接受的，就算你有在多的无奈与痛苦。也不可洗刷你的过去 .....
..... 毕竟是不光彩的，假如你的父母知道做何感想 .....
..... 你有想过你以后的生活吗？ .....
..... 如果一个男人真的爱你，是不会在意你是不是处女，并不是不是处女就不纯洁了。但是，如果一个男的知道你跟了他之后，还是不介意出卖身体，我想就是另外的想法了吧。.....
---------- ---------- ----------
..... 痛心 .....
No comments:
Post a Comment